د افغانستان د خبریالانو مرکز په پام کې لري چې د خبریال ورځې په مناسبت د څلورم کال لپاره د یوې رقابتي سیالۍ په ترڅ کې د کال خبریال غوره کړي.
په شرایطو برابر کسان
هغه خبریالان، انځوراخیستونکي، سموونکي ( ایډیټوران) او د راډیویي او تلوېزیوني خپرونو چلوونکي ( له تفریحي خپرونو پرته)، چې باور لري په روان کال کې یې د خبریالۍ په برخه کې څرګندې لاسته راوړنې لرلي، کولای شي نوم لیکنه وکړي. یادې لاسته راوړنې کېدای شي:
- څېړنیز راپورونه چې د ستونزو د حل لپاره یې د مسؤلینو غبرګون او بدلون راوستی وي.
- نوښتګرې رسنیزې هڅې چې د رسنیو او خبررسونې په بهیر کې د ښهوالي لامل شوې وي.
- د هغو وضعیتونو په اړه راپورونه چې عموماً د رسنیو له سترګو پټ پاتې کېږي.
- د بشري حقونو، د ښځو او ماشومانو د حقونو اړوند ځانګړي او اصیل راپورونه یا رسنیز فعالیتونه.
- له افغانستان څخه داسې نوښتګر راپورونه چې د نورو، په ځانګړي ډول نړیوالو رسنیو پام یې ځانته را اړولی وي او پر بنسټ یې راپورونه یا خبرونه جوړ شوي وي.
د نوم لیکنې شرایط
په کورنۍ او یا نړیواله رسنۍ کې کاري تجربه.
راپور، لیکنه او یا انځور چې دې سیالۍ ته استول کېږي باید د افغانستان په اړه وي.
راپور، لیکنه او یا انځور باید د ۱۳۹۵ کال په اوږدو کې په کورنۍ یا نړیواله رسنۍ کې خپور شوی وي.
د یادې سیالۍ ګډونوال باید د افغانستان پېژند پاڼه ولري.
د غوښتنلیک د وړاندې کولو څرنګوالی
هره رسنۍ کولای شي یو کس د دې برنامې لپاره نوماند کړي، او یا خپله غوښتونکی کولای شي په مستقیم ډول خپل غوښتنلیک وړاندې کړي.
د مهربانۍ له مخې، غږیز او یا انځوریز راپورونه د متن له لیکي بڼې سره، لیکلي راپورونه او یا د انځورونو سافټ دې، لاندې پتې ته ولېږئ د امکان په صورت کې لینک هم ورسره یوځای کړئ:
این آدرس ایمیل توسط spambots حفاظت می شود. برای دیدن شما نیاز به جاوا اسکریپت دارید
جایزه
د «د افغانستان د کال خبریال» نښان او ۱۲۰۰ ډالره نقدي جایزه.
«د افغانستان د کال خبریال» به د خبریال د ورځې (د حوت ۲۷مه) په مناسبت، د لوړپوړو دولتي چارواکو او د رسنیز ټولنې د استازو په شتون کې د یوې سترې غونډې په ترڅ کې، معرفي او وستایل شي.
د غوښتنليک سپارلو وروستۍ نېټه: د کب ۵مه
پاملرنه: د سیالۍ موده د کب تر لسمې وغځول شوه