۱۴۰۴ د کب ۲۷مه

کابل – د افغانستان د خبریالانو مرکز په ۱۴۰۴ کال کې د هېواد د رسنیو د ازادۍ د وضعیت راپور خپور کړ. یاد راپور چې په هېواد کې د خبریالانو او رسنیو له حقونو څخه د سرغړونو پر بنسټ چمتو شوی ښيي، چې د طالبانو واکمنې ادارې پر رسنیو کنټرول زیات کړی او د ځپنې او سانسور بهیر په بې‌ساري ډول چټک شوی دی.

په دې راپور کې، چې نن د کب په ۲۷مه د « د خبریال ملي ورځې» په مناسبت خپور شو، راغلي چې د افغانستان د خبریالانو مرکز په ۱۴۰۴ کال کې د رسنیو له ازادۍ څخه د سرغړونې او د خبریالانو پر وړاندې د تاوتریخوالي لږ تر لږه ۲۰۷ پېښې ثبت کړي، چې پکې د دوه کسانو وژل کېدل، د یو کس ټپي کېدل او د ۲۱ خبریالانو د نیولو په ګډون، ۱۸۳ د ګواښ پېښې شاملې دي.