کابل، چهارشنبه ۳۰ سنبله ۱۳۹۰
د ایران د پرس ټي وي ټلویزیون فلمبردار فرهاد تقدسي چې په کابل کې د طالبانو د وروستیو بریدونو له امله ټپي شوی و د سه شنبه په ورځ ساه ورکړه.
د پرس ټي وي خبري شبکې په یوه خپره شوې اعلامیه کې راغلي چې دا ځوان فلمبردار د دې ټلویزیوني شبکې پر دفتر د راکټ لګېدلو له امله ټپي شوی و.
طالب بریدګرو د سنبلې ۲۲ سه شنبه له غرمې وروسته په څو ځایونو باندې په عبدالحق څلورلارې کې چې د امریکا سفارت او ناټو قوماندانۍ ته نږدې دی بریدونه وکړل.
دا بریدونه چې په ځانمرګیو واسکټونو، وسلې او ګرنېټونو سمبال د ۹ وسله والو طالبانو په وسیله وشو، ۶ کسان یې ووژل او ۳۳ کسان نور چې ډېری یې ملکیان وو ټپيان کړل.
فرهاد تقدسي د مړینې پر وخت ۲۳ کلن و او له دوو کلونو راپه دېخوا یې له پرس ټي وي شبکې سره کار کولو.
پرس ټي وي یوه انګلیسي ژبې ایراني شبکه ده چې د دې هېواد د دولت له لوري اداره کیږي.